தேசியச் செய்திகள்

பிறப்பு மற்றும் இறப்பு பதிவு மசோதா, 2026

August 4 , 2026 2 days 81 0

இம்மசோதா உள்துறை இணையமைச்சர் நித்யானந்த் ராய் அவர்களால் மக்களவையில் அறிமுகப்படுத்தப்பட்டது.
இது, தாமதமான பதிவுகளுக்கான கடுமையான விதிமுறைகள் மற்றும் படிநிலை அடிப்படையிலான ஒப்புதல் செயல்முறையை உருவாக்க, 1969-ஆம் ஆண்டின் பிறப்பு மற்றும் இறப்பு பதிவுச் சட்டத்தை (2023-ஆம் ஆண்டில் திருத்தப்பட்டவாறு) திருத்துகிறது.
தற்போதைய சட்டத்தின்படி, ஒரு பிறப்பு அல்லது இறப்பு நிகழ்ந்து ஓராண்டுக்குப் பிறகு அது குறித்த தகவல் பதிவாளரிடம் அளிக்கப்பட்டால், அதைப் பதிவு செய்ய ஒரு தனிப்பட்ட உத்தரவு தேவைப்படுகிறது.
அத்தகைய உத்தரவை (i) மாவட்ட நீதித்துறை நடுவர் (District Magistrate), (ii) உட்கோட்ட நீதித்துறை நடுவர் (Sub-divisional Magistrate) அல்லது (iii) மாவட்ட நீதித்துறை நடுவரால் அங்கீகரிக்கப்பட்ட நிர்வாக நீதித்துறை நடுவர் (Executive Magistrate) ஆகியோர் பிறப்பிக்கலாம்.
தகவலின் துல்லியத்தன்மையைச் சரிபார்த்த பின்னரும், நிர்ணயிக்கப்பட்ட கட்டணத்தைச் செலுத்திய பின்னரும் இந்த உத்தரவு பிறப்பிக்கப்படலாம்.
ஆனால், இரண்டு ஆண்டுகளுக்கு மேலான தாமதம் ஏற்படும் பட்சத்தில், 'முதல் வகுப்பு நீதித்துறை நடுவர்' (Judicial Magistrate of the First Class) மட்டுமே அத்தகைய உத்தரவைப் பிறப்பிக்க முடியும் என்று இம்மசோதா வகை செய்கிறது.
முன்மொழியப்பட்டுள்ள இந்தச் சட்டம், தாமதத்தின் கால அளவைப் பொறுத்து இரண்டு நிலைகளைக் கொண்ட ஒப்புதல் நடைமுறையை அறிமுகப்படுத்துகிறது.
தற்போதைய சட்டத்தின்படி, பிறப்பு மற்றும் இறப்புகளைப் பதிவு செய்வது கட்டாயம் ஆகும்; மேலும், இச்சட்டத்தின் கீழ் வழங்கப்படும் சான்றிதழ் ஒரு தனிநபருக்குச் சட்டப்பூர்வ அடையாளத்தை அளிக்கிறது.
தாமதமான பதிவுக்கான நடைமுறைகளை மேலும் கடுமையாக்கவும், பிறப்பு மற்றும் இறப்புகள் குறித்த தகவல்களை உரிய நேரத்தில் தெரிவிப்பதை ஊக்குவிக்கவும் இந்த புதிய மசோதா கொண்டுவரப்பட்டுள்ளது.