சுற்றுச்சூழல் செய்திகள்

வங்காள விரிகுடாவில் ஓசோன் முரண்பாடு

August 12 , 2026 21 hrs 0 min 60 0

வடக்கு வங்காள விரிகுடாவிற்கு மேல் 21-23 கி.மீ உயரத்தில் வழக்கத்திற்கு மாறாக ஒரு தடிமனான ஓசோன் படலத்தை அறிவியலாளர்கள் கண்டறிந்துள்ளனர்.
கிழக்கு இந்தியாவின் மீது ஓசோன் செறிவானது இயல்பை விட அதிகமாக இருந்ததுடன், அந்தப் படலம் 24 மணி நேரத்திற்கும் மேலாக நீடித்திருந்தது.
நைனிடாலில் உள்ள ஆரியபட்டா கண்காணிப்பு அறிவியல் ஆராய்ச்சி நிறுவனம் (ARIES) மற்றும் பிற இந்திய நிறுவனங்களைச் சேர்ந்த அறிவியலாளர்கள், முதல் கட்ட NetRAD-ASMA பிரச்சாரத்தின் கீழ் இந்த நிகழ்வை ஆய்வு செய்தனர்.
இந்த ஆய்வில் 206.5 மெகா ஹெர்ட்ஸ் அடுக்குமண்டல- அடிவளிமண்டல (ST) ரேடார்கள், வானிலை பலூன்கள், செயற்கைக்கோள்கள் மற்றும் வளிமண்டல மாதிரிகள் பயன்படுத்தப்பட்டன.
கீழ் அடுக்குமண்டலத்தில் தொடர்ச்சியான கீழ்நோக்கிய காற்று இயக்கம் மற்றும் ஓசோன் நிறைந்த காற்றின் இடமாற்றம் ஆகியவற்றை கண்காணிப்புகள் காட்டுகின்றன.
கிடைமட்டமான ஓசோன் இடமாற்றம், கீழ்நோக்கிய இயக்கம் மற்றும் காற்றின் சுருக்கம் ஆகியவை இந்த அசாதாரண ஓசோன் அதிகரிப்புக்கு முக்கியக் காரணம் என்று அறிவியலாளர்கள் முடிவு செய்துள்ளனர்.