தேசியச் செய்திகள்

வினாத் தாள் கசிவு தடுப்பு மசோதா

August 1 , 2026 23 days 77 0

பிரதமர் தலைமையிலான மத்திய அமைச்சரவை, வினாத் தாள் கசிவு குற்றங்களுக்கான தண்டனையை கணிசமாகக் கடுமையாக்கும் ஒரு வரைவுச் சட்டத்திற்கு ஒப்புதல் அளித்துள்ளது.
முன்மொழியப்பட்ட திருத்தங்களின்படி, வினாத் தாள் கசிவுகளில் குற்றவாளிகளாகக் கண்டறியப் பட்ட நபர்களுக்குக் குறைந்தபட்சம் ஐந்து ஆண்டுகள் சிறைத் தண்டனையும், அதனுடன் நிதி அபராதமும் விதிக்கப்படலாம்.
ஒழுங்கமைக்கப்பட்ட வினாத் தாள் கசிவு கும்பல்கள் சம்பந்தப்பட்ட வழக்குகளுக்கு அதிக பட்சமாக 10 ஆண்டுகள் சிறைத்தண்டனையும், ரூ.10 கோடி வரையிலான அபராதமும் விதிக்கப்படும்.
இந்த வரைவுச் சட்டம், காலவரையறைக்குட்பட்ட விசாரணைகள் மற்றும் கட்டாய விரைவு நீதிமன்ற விசாரணைகளுக்கான விதிகளையும் அறிமுகப்படுத்துகிறது.
இந்த முன்மொழிவின்படி, வினாத் தாள் கசிவு வழக்குகளின் விசாரணைகள் மூன்று மாதங்களுக்குள் முடிக்கப்பட வேண்டும்.
தற்போதுள்ள சட்டம், வினாத் தாள் கசிவுகளில் ஈடுபடும் நபர்களுக்கு மூன்று முதல் ஐந்து ஆண்டுகள் வரை சிறைத் தண்டனை விதிக்கிறது.
ஒழுங்கமைக்கப்பட்ட குற்றங்களுக்கு தற்போது ஐந்து முதல் 10 ஆண்டுகள் வரை சிறைத் தண்டனையும், குறைந்தபட்சம் ரூ.1 கோடி அபராதமும் விதிக்கப்படுகிறது.
தேர்வு மோசடி மூலம் லாபம் ஈட்டும் ஒழுங்கமைக்கப்பட்ட குற்றக் குழுக்களையும் நிறுவனங்களையும் தடுப்பதையும், அதே நேரத்தில் தேர்வர்கள் சட்டத்தின் கீழ் தண்டிக்கப்படாமல் இருப்பதை உறுதி செய்வதையும் இந்தத் திருத்தங்கள் நோக்கமாகக் கொண்டுள்ளன.
தேர்வு மோசடிக்கு எதிரான சட்டக் கட்டமைப்பை வலுப்படுத்தும் வகையில், பொதுத் தேர்வுகள் (முறைகேடுகளைத் தடுத்தல்) சட்டம், 2024-ஐ திருத்துவதை இது நோக்கமாகக் கொண்டுள்ளது.
2024 ஆம் ஆண்டின் இந்தச் சட்டம், UPSC மற்றும் SSC போன்ற முகமைகளால் நடத்தப்படும் ஆட்சேர்ப்புத் தேர்வுகளையும், NEET, JEE மற்றும் CUET உள்ளிட்ட முக்கிய நுழைவுத் தேர்வுகளையும் உள்ளடக்கியது.
தொடர்ச்சியான தேர்வு முறைகேடுகள் குறித்த பரவலான கவலைக்குப் பிறகு, வினாத்தாள் கசிவுகள் மற்றும் ஒழுங்கமைக்கப்பட்ட தேர்வு முறைகேடுகளைக் கையாள்வதற்காக குறிப்பாக இயற்றப்பட்ட முதல் மத்திய சட்டம் பொதுத் தேர்வுகள் (முறைகேடுகளைத் தடுத்தல்) சட்டம், 2024 ஆகும்.