அறிக்கைகள் மற்றும் குறியீடுகள்

காடுகள் மற்றும் உணவு குறித்த UN-FAO அறிக்கை

September 19 , 2026 2 days 33 0

'உணவுக்கான காடுகள்: மக்களுக்கு ஊட்டமளித்தல், புவியை நிலைநிறுத்துதல்' என்ற அறிக்கை, ஐக்கிய நாடுகளின் உணவு மற்றும் விவசாய அமைப்பால் (FAO) வெளியிடப் பட்டது.
இது லேண்ட்ஸ்கேப் அலையன்ஸ் உடன் இணைந்து உருவாக்கப்பட்டது.
இது பசி மற்றும் வறுமையைக் குறைப்பதில் காடுகளின் முக்கியத்துவத்தை எடுத்துரைக்கிறது மற்றும் வேளாண் உணவு அமைப்பு கொள்கைகளில் அவற்றைச் சேர்க்குமாறு நாடுகளை வலியுறுத்துகிறது.
உணவுப் பாதுகாப்பு மற்றும் ஊட்டச்சத்தில் (FSN) வன உணவுகளின் பங்களிப்பில் உள்ள பிராந்திய வேறுபாடுகளை இந்த அறிக்கை எடுத்துக்காட்டியது.
ஆப்பிரிக்காவின் சில பகுதிகளில், சில சமூகங்கள் தங்கள் தினசரி புரதத்தில் 80 சதவீதம் வரை காட்டு இறைச்சியிலிருந்து பெறுகின்றன.
அமேசான் காடுகளில், எடையின் அடிப்படையில் உட்கொள்ளப்படும் மொத்த உணவில் 44 சதவீதம் மீன்களாகும்; இவற்றுடன் காட்டு இறைச்சி, பிரேசில் கொட்டைகள் மற்றும் அசாய் பெர்ரிகளும் உள்ளன.
ஐரோப்பாவில், 28 நாடுகளை உள்ளடக்கிய ஒரு கணக்கெடுப்பில், பதிலளித்தவர்களில் 90 சதவீதம் பேர் ஒவ்வொரு ஆண்டும் குறைந்தது ஒரு காட்டு உணவையாவது உட்கொள்கின்றனர், அதே நேரத்தில் மூன்றில் ஒரு பங்கிற்கும் அதிகமானோர் ஆண்டுதோறும் வேட்டை இறைச்சியை உண்கின்றனர்.
வட அமெரிக்காவில், காட்டு இறைச்சி வாழ்வாதாரத்தை விட பொழுது போக்கிற்காகவே அதிகம் பயன்படுத்தப்படுகிறது.
இந்தியாவின் பழங்குடிச் சமூகங்கள் காட்டு உணவுகளைப் பெருமளவில் பயன்படுத்துகின்றனர்.
அதே சமயம், அதிக வனப்பகுதி உள்ள இடங்களில் வாழும் குழந்தைகள் பலதரப்பட்ட உணவுகளை உட்கொள்வதோடு, வளர்ச்சி குன்றல் விகிதமும் குறைவாக இருப்பதாக ஆய்வுகள் கண்டறிந்துள்ளன.
கிழக்கு இந்தியாவில் நடத்தப்பட்ட மற்றொரு ஆய்வில், காட்டு உணவுகளை (பெரும்பாலும் காடுகளில் இருந்து பெறப்படுபவை) உட்கொள்வது, குறிப்பாகப் பற்றாக்குறைக் காலத்தில், பெண்களிடையே அதிக உணவுப் பன்முகத் தன்மை மதிப்பெண்களுடன் தொடர்புடையதாகக் கண்டறியப்பட்டது.