சுற்றுச்சூழல் செய்திகள்

கூண்டில் வளர்க்கப்பட்ட மெலிந்த அலகுடைய கழுகுகள் (slender-billed vultures) விடுவிப்பு

August 16 , 2026 3 days 32 0

அசாம், உலகிலேயே முதன்முறையாக கூண்டில் வளர்க்கப்பட்ட மெல்லிய அலகு கழுகுகளை (ஜிப்ஸ் டெனுயிரோஸ்ட்ரிஸ்) விடுவித்துள்ளது.
அசாமில் உள்ள பம்பாய் இயற்கை வரலாற்றுச் சங்கத்தின் (BNHS) பாதுகாப்பு மையத்தில் கூண்டில் வளர்க்கப்பட்ட ஐந்து மெல்லிய அலகு கழுகுகள் விடுவிக்கப் பட்டன.
இவை, காசிரங்கா தேசியப் பூங்கா மற்றும் புலிகள் காப்பகத்தின் பிஸ்வநாத் பிரிவில் உள்ள ஜடாயு மென் விடுவிப்பு மையத்தில் விடுவிக்கப்பட்டன.
கால்நடை வலி நிவாரணிகளின் பயன்பாடு காரணமாக, கடந்த 20 ஆண்டுகளில் இந்தியாவில் ஜிப்ஸ் கழுகுகளின் எண்ணிக்கை 99% குறைந்துள்ளது.
டிக்ளோஃபெனாக், அசெக்ளோஃபெனாக், கீட்டோபுரோஃபென் மற்றும் நிமெசுலைடு ஆகிய நான்கு மருந்துகளை மத்திய அரசு தடை செய்திருந்தாலும், பூச்சிக்கொல்லி நச்சுத்தன்மை அசாமில் உள்ள கழுகுகளுக்கு ஒரு அச்சுறுத்தலாகவே உள்ளது.
மெல்லிய அலகு கழுகு என்பது துணை-இமயமலைப் பகுதிகள் மற்றும் தென்கிழக்கு ஆசியாவைத் தாயகமாகக் கொண்ட ஒரு பழைய உலகக் கழுகு இனமாகும்.
இந்தியத் துணைக்கண்டத்தில் இதன் எண்ணிக்கை வேகமாக குறைந்து வருவதால், 2002 ஆம் ஆண்டு முதல் இது மிக அருகி வரும் இனமாக அறிவிக்கப்பட்டுள்ளது.
இது முன்னர் "நீண்ட அலகு கழுகு" என்ற பெயரில் இந்தியக் கழுகு என்றும் அழைக்கப் பட்டது.
ஆனால், இந்தியக் கழுகு கங்கைக்குத் தெற்கே மட்டுமே காணப்படுகிறது மற்றும் செங்குத்துப் பாறைகளில் இனப்பெருக்கம் செய்கிறது, அதே சமயம் மெல்லிய அலகு கழுகு சாலையோரம் காணப்படுகிறது மற்றும் மரங்களில் கூடு கட்டுகிறது.
மெல்லிய அலகு கழுகு இந்தியாவில் வடக்கே கங்கைச் சமவெளி, மேற்கே இமாச்சலப் பிரதேசம், தெற்கே வடக்கு ஒடிசா வரை, மற்றும் கிழக்கே அசாம் வரை காணப் படுகிறது.
அவை பொதுவாக ஓரிடத்திலேயே தங்கும் பறவைகள்; அவை நீண்ட தூரம் பயணம் செய்வதோ அல்லது எந்தக் காரணத்திற்காகவும் வலசை போவதோ இல்லை.
1883-ஆம் ஆண்டில் நிறுவப்பட்ட பம்பாய் இயற்கை வரலாற்றுச் சங்கம் (BNHS), இந்தியாவில் பாதுகாப்பு மற்றும் பல்லுயிர் ஆராய்ச்சியில் ஈடுபட்டுள்ள மிகப்பெரிய அரசு சாரா அமைப்புகளில் ஒன்றாகும்.
ஆசிய நீர்ப்பறவைகள் கணக்கெடுப்பு என்பது, பம்பாய் இயற்கை வரலாற்றுச் சங்கத்தால் வெட்லண்ட்ஸ் இன்டர்நேஷனல் அமைப்புடன் இணைந்து இந்தியாவில் மேற்கொள்ளப்படும் ஒரு வருடாந்திரப் பணியாகும்.
இந்தப் பணி, 'சர்வதேச நீர்ப்பறவைகள் கணக்கெடுப்பு' என்ற சர்வதேசப் பணியின் ஒரு பகுதியாகும்.
BNHS, இந்தியாவில் பேர்ட்லைஃப் இன்டர்நேஷனல் அமைப்பின் பங்குதாரராகும்.
பேர்ட்லைஃப் இன்டர்நேஷனல் என்பது பறவைகளையும் அவற்றின் வாழ்விடங்களையும் பாதுகாக்கப் பாடுபடும் அரசு சாரா அமைப்புகளின் ஒரு உலகளாவிய கூட்டமைப்பாகும்.
இது, இயற்கை பாதுகாப்புக்கான சர்வதேச ஒன்றியத்தின் (IUCN) பறவைகளுக்கான செம்பட்டியல் அதிகார அமைப்பாகும்.
பேர்ட்லைஃப் இன்டர்நேஷனல், ஆப்பிரிக்கா, அமெரிக்கா, ஆசியா, ஐரோப்பா மற்றும் மத்திய ஆசியா, மத்திய கிழக்கு மற்றும் பசிபிக் ஆகிய பகுதிகளில் ஒன்பது பாதுகாப்புத் திட்டங்களைச் செயல்படுத்தியுள்ளது.
அவற்றில் முக்கியமான பறவை மற்றும் பல்லுயிர் பகுதிகள் திட்டம், கடல்சார் திட்டம், அழிவுகளைத் தடுக்கும் திட்டம் மற்றும் பறவைப் பாதைகள் திட்டம் ஆகியவை அடங்கும்.
வெட்லண்ட்ஸ் இன்டர்நேஷனல் என்பது, மக்கள் மற்றும் பல்லுயிர்களுக்காக ஈரநிலங்களையும் அவற்றின் வளங்களையும் பேணிப் பாதுகாக்கவும் மீட்டெடுக்கவும் செயல்படும் ஒரு உலகளாவிய அமைப்பாகும்.
இது உலகெங்கிலும் உள்ள அரசாங்க மற்றும் அரசு சாரா நிறுவனங்களின் உறுப்பினர் ஆதரவுடன் இயங்கும் ஒரு சுதந்திரமான, இலாப நோக்கற்ற, உலகளாவிய அமைப்பு ஆகும்.