அறிக்கைகள் மற்றும் குறியீடுகள்

மோதல் நடைபெறும் பகுதிகளில் உள்ள பெண்கள் குறித்த ஐ.நா. அறிக்கை

October 30 , 2026 14 hrs 0 min 21 0

ஆயுத மோதல்களில் பெண்கள் மற்றும் சிறுமிகளுக்கு எதிரான வன்முறைகள் மற்றும் உயிரிழப்புகள் அதிகரித்து வருவதை சுட்டிக்காட்டும் பெண்கள், அமைதி மற்றும் பாதுகாப்பு குறித்த ஐ.நா. பொதுச் செயலாளரின் அறிக்கையை ஐ.நா. பெண்கள் அமைப்பு (UN Women) வெளியிட்டது.
2025 ஆம் ஆண்டில், ஆயுத மோதல்களில் 37,000-க்கும் மேற்பட்ட பொதுமக்கள் கொல்லப்பட்டனர்; இதில் நான்கில் ஒருவர் பெண் அல்லது சிறுமி ஆவர். 2021 ஆம் ஆண்டிலிருந்து இவர்களின் விகிதம் இருமடங்காக அதிகரித்துள்ளது.
75 கோடிக்கும் அதிகமான பெண்கள் மற்றும் சிறுமிகள் செயலில் உள்ள மோதல் நடக்கும் பகுதிகளுக்கு 50 கி.மீ தூரத்திற்குள் வாழ்கின்றனர்; 2025 ஆம் ஆண்டில் மோதல் தொடர்பான பாலியல் வன்முறை நிகழ்ந்த 9,788 வழக்குகளை ஐ.நா. உறுதிப் படுத்தியுள்ளது.
2025 ஆம் ஆண்டில் நடைபெற்ற 57 அமைதிப் பேச்சுவார்த்தைகளில் பெண்களின் பங்கு 5% மட்டுமே இருந்தது. 13 போர் நிறுத்த ஒப்பந்தங்களில் எதுவுமே மோதல் தொடர்பான பாலியல் வன்முறையை வெளிப்படையாகத் தடை செய்யவில்லை.
மோதலால் பாதிக்கப்பட்ட நாடுகளில் உள்ள பெண்கள் ஊதியமில்லாத வீட்டு வேலைகள் மற்றும் பராமரிப்புப் பணிகளுக்காக ஆண்களை விட ஐந்து மடங்கு அதிக நேரத்தைச் செலவிடுகின்றனர்; சிறுமிகள் பள்ளியிலிருந்து இடைநிற்கும் வாய்ப்பு 2.5 மடங்கு அதிகமாக உள்ளது.