சர்வதேசச் செய்திகள்

தெற்கு இந்தியப் பெருங்கடல் மீன்பிடி ஒப்பந்தம்

October 17 , 2026 5 days 96 0

தெற்கு இந்தியப் பெருங்கடல் மீன்பிடி ஒப்பந்தத்தில் (SIOFA) இந்தியா இணைவதற்கு மத்திய அரசு ஒப்புதல் அளித்துள்ளது.
2006 ஆம் ஆண்டு ஜூலை 7 அன்று ரோமில் கையெழுத்திடப்பட்ட இது, தெற்கு இந்தியப் பெருங்கடலில் உள்ள மீன்பிடி வளங்களைப் பாதுகாக்கவும், நிலையான முறையில் பயன்படுத்தவும் 2012 ஆம் ஆண்டு ஜூன் மாதத்தில் நடைமுறைக்கு வந்தது.
கடல் சட்டத்திற்கான ஐக்கிய நாடுகளின் மாநாட்டின் (UNCLOS) கீழ் அதிகம் இடம்பெயரும் உயிரினங்களைத் தவிர்த்து மீன்கள், மெல்லுடலிகள், ஓட்டுடைய கணுக்காலிகள் மற்றும் பிற உறைவிட உயிரினங்களை இது உள்ளடக்கியது.
தரப்பினரின் கூட்டம், அறிவியல் குழு மற்றும் செயலகம் ஆகியவை இதன் முக்கிய அமைப்புகளாகும்.
இந்தியா இதில் இணைவதானது முடிவெடுப்பதில் முழுப் பங்கேற்பு, அறிவியல் தரவுகள் மற்றும் ஆராய்ச்சிக்கான அணுகல் மற்றும் இந்திய மீனவர்கள் மற்றும் தொழில்முனைவோருக்கு புதிய மீன்பிடி வாய்ப்புகளைச் சாத்தியமாக்கும்.