சர்வதேசச் செய்திகள்

IEA-வின் மின்சார இடைக்கால அறிக்கை 2026

August 2 , 2026 17 days 90 0

IEA-வின் 2026 மின்சார இடைக்கால அறிக்கையின்படி, உலகளாவிய மின்சார நுகர்வு 2025-ஆம் ஆண்டில் 28,600 டெராவாட் மணிநேரத்திலிருந்து 2027-ஆம் ஆண்டுக்குள் 30,700 டெராவாட் மணி நேரமாக உயரும் என்று கணிக்கப்பட்டுள்ளது.
தொழில்துறை, மின்சார வாகனங்கள், குளிரூட்டல், வீட்டு உபகரணங்கள் மற்றும் தரவு மையங்கள் ஆகியவற்றால் இந்த வளர்ச்சி உந்தப்படும்.
2025-ஆம் ஆண்டில் ஏறக்குறைய சமநிலையை எட்டிய பிறகு, புதுப்பிக்கத்தக்க மின்சார உற்பத்தி 2026-ஆம் ஆண்டில் உலகளவில் நிலக்கரியை விஞ்சும் என எதிர் பார்க்கப் படுகிறது.
உலகளாவிய மின்சார விநியோக வளர்ச்சியில் சூரிய ஒளி மின்சக்தி மிகப்பெரியப் பங்களிப்பாளராகத் தொடர்கிறது.
சூரிய ஒளிமின்சக்தி, காற்றாலை மின்சாரத்தை விஞ்சி, நீர்மின்சக்திக்கு அடுத்த படியாக உலகின் இரண்டாவது பெரிய புதுப்பிக்கத்தக்க மின்சார ஆதாரமாக மாறும்.
கடந்த பத்தாண்டுகளில் காணப்பட்ட வளர்ச்சிப் போக்கை மாற்றி, உலகளாவிய எரிவாயு மூலமான மின்சார உற்பத்தி 2026-ஆம் ஆண்டில் பெரிய அளவில் மாற்றமின்றி இருக்கும் என்று கணிக்கப்பட்டுள்ளது.
சீனா மற்றும் இந்தியாவில் புதிய அணு உலைகள் செயல்படத் தொடங்குவதாலும், அமெரிக்கா மற்றும் பிரான்சில் வலுவான உற்பத்தி இருப்பதாலும், 2026-ஆம் ஆண்டில் அணுமின் உற்பத்தி அதிகரித்து, 2027-ஆம் ஆண்டில் மேலும் வேகமெடுக்கும் என எதிர்பார்க்கப்படுகிறது.
தொழில்துறை நடவடிக்கைகள், சேவைகள் வளர்ச்சி மற்றும் வெப்ப அலைகளால் ஏற்படும் குளிரூட்டும் தேவை ஆகியவற்றின் ஆதரவுடன், 2026-ஆம் ஆண்டில் இந்தியாவின் மின்சாரத் தேவை 7% மீண்டு வரும் என கணிக்கப் பட்டுள்ளது.
மாலை நேர உச்சபட்ச மின் தேவை தொடர்ந்து அதிகரித்து, மின் கட்டமைப்புக்கு பெரும் அழுத்தத்தை ஏற்படுத்தி வரும் நிலையிலும், இந்தியா ஜூலை மாதத்தில் முதன்முறையாக 100 ஜிகாவாட் மாறும் புதுப்பிக்கத்தக்க ஆற்றல் விநியோகத்தைக் கடந்தது.
வேகமாக அதிகரித்து வரும் மாலை நேர உச்சபட்ச மின் தேவையால், நிலக்கரி மற்றும் எரிவாயு மின் நிலையங்கள் உற்பத்தியை அதிகரிக்க வேண்டிய தேவை தொடர்ந்து உள்ளது.
2026-ஆம் ஆண்டின் முதல் பாதியில் இந்தியாவின் ஒருங்கிணைந்த சூரிய ஒளிமின்சக்தி மற்றும் காற்றாலை மின் உற்பத்தி 25 சதவீதத்திற்கும் மேலாக அதிகரித்தது.
மொத்த மின் விநியோகத்தில் அதன் பங்கு 42.79 சதவீதத்தை எட்டியதுடன் இது இதுவரை பதிவு செய்யப்பட்டதிலேயே மிக உயர்ந்த அளவாகும்.
உடனடி தரைவழி மாறும் புதுப்பிக்கத்தக்க ஆற்றல் உற்பத்தி 103 ஜிகாவாட் என்ற புதிய உச்சத்தைத் தொட்டது.
புதுப்பிக்கத்தக்க ஆற்றலின் பங்கு 35 சதவீதம் முதல் 42 சதவீதம் வரை இருந்துள்ளது.
நீர்மின்சக்தி மற்றும் அணுசக்தியையும் சேர்த்துக் கொள்ளும்போது, புதைபடிவமற்ற மூலங்கள் மொத்த மின்சார விநியோகத்தில் கிட்டத்தட்ட பாதியைக் கொண்டுள்ளன.
சர்வதேச எரிசக்தி முகமை (IEA) என்பது 1974-ஆம் ஆண்டில் நிறுவப்பட்ட, பாரிஸைத் தலைமையிடமாகக் கொண்ட ஒரு தன்னாட்சி பெற்ற அரசுகளுக்கிடையேயான அமைப்பாகும்.
இது உலகளாவிய எரிசக்தித் துறை குறித்த கொள்கைப் பரிந்துரைகள், பகுப்பாய்வு மற்றும் தரவுகளை வழங்குகிறது.
IEA-வின் 32 உறுப்பு நாடுகளும் 13 கூட்டமைப்பு நாடுகளும் உலகளாவிய எரிசக்தித் தேவையின் 75%-ஐப் பிரதிநிதித்துவப்படுத்துகின்றன.
இது 1973 ஆம் ஆண்டு எண்ணெய் நெருக்கடிக்குப் பிறகு, பொருளாதார ஒத்துழைப்பு மற்றும் மேம்பாட்டு அமைப்பின் (OECD) கட்டமைப்பின் கீழ் அமைக்கப்பட்டது.
இதன் வெளியீடுகளில் வருடாந்திர உலக எரிசக்தி கண்ணோட்டம் மற்றும் 2050-ஆம் ஆண்டுக்குள் நிகர பூஜ்ஜிய அறிக்கை ஆகியவை அடங்கும்.
IEA-வின் அனைத்து உறுப்பு நாடுகளும் புவி வெப்பமயமாதலை 1.5 °C-ஆகக் கட்டுப்படுத்தும் நோக்கம் கொண்ட பாரிஸ் ஒப்பந்தத்தில் கையெழுத்திட்டுள்ளன, மேலும் IEA உறுப்பு அரசாங்கங்களில் மூன்றில் இரண்டு பங்கு அரசாங்கங்கள் 2050-ஆம் ஆண்டுக்குள் உமிழ்வு நடுநிலைமையை அடைவதற்கான உறுதிமொழிகளை அளித்துள்ளன.
ஆனால் அமெரிக்கா இரண்டு முறை இதிலிருந்து விலகியுள்ளது.
இந்தியா, 2017 ஆம் ஆண்டு மார்ச் 30 அன்று சர்வதேச எரிசக்தி முகமையுடன் (IEA) தனது 'இணைவு' நிலையை அதிகாரப்பூர்வமாக அறிவித்தது.
2025 ஆம் ஆண்டு ஜூலை மாதத்தில், பிரேசில் ஓர் உறுப்பினர் நாடாக ஆவதற்கான செயல்முறையைத் தொடங்கியது.
IEA-வின் தூய்மையான எரிசக்தி மாற்றங்கள் திட்டம், பிரேசில், சீனா, இந்தியா, இந்தோனேசியா, மெக்சிகோ மற்றும் தென்னாப்பிரிக்கா ஆகிய நாடுகளை முன்னுரிமை நாடுகளாக அடையாளம் கண்டுள்ளது.