தேசியச் செய்திகள்

சேவை உற்பத்திக் குறியீட்டின் (ISP) துணைத் துறை அளவிலான சோதனைப் பதிப்பு வெளியீடு

August 5 , 2026 3 days 18 0

புள்ளி விவரம் மற்றும் திட்ட அமலாக்க அமைச்சகமானது (MoSPI), நாட்டின் சேவைத் துறையில் உள்ள 19 துணைத் துறைகளுக்கான முதல் சோதனை 'சேவை உற்பத்திக் குறியீட்டை' (ISP) வெளியிட்டுள்ளது.
இது தற்போதுள்ள 'தொழில்துறை உற்பத்திக் குறியீட்டிற்கு' (IIP) இணையானதாக அமையும்.
முறையான சேவைத் துறையில் நடைபெறும் குறுகிய காலச் செயல்பாடுகளை மாதந்தோறும் அளவிடும் முறையை இது முதன்முறையாக வழங்குகிறது.
2024-25 ஆம் ஆண்டை அடிப்படை ஆண்டாகக் கொண்ட இந்தக் குறியீடு, 2026 ஆம் ஆண்டு ஏப்ரல் மாதத்திற்கான தரவுகளை உள்ளடக்கியதுடன், இந்தியாவின் சேவைத் துறையில் சுமார் 60 சதவீதப் பங்களிப்பைக் கணக்கில் கொள்கிறது.
இந்தியாவின் சேவைத் துறையை அளவிடும் முறையை மேம்படுத்துவதும், நாட்டின் புள்ளி விவர அமைப்பை வலுப்படுத்துவதும் இதன் நோக்கமாகும்.
சோதனைத் தொடரின் நிலைத்தன்மையை மதிப்பீடு செய்து அதன் வரம்பை விரிவுபடுத்திய பிறகு, முழுமையான சேவை உற்பத்திக் குறியீடு அறிமுகப்படுத்தப்படும் என்று தெரிவிக்கப் பட்டுள்ளது என்பதோடு முதல் கட்டத் தரவுகள் சேவைத் துறையில் பரவலான வளர்ச்சியைக் காட்டுகின்றன.
காலப்போக்கில், சுகாதார சேவைகள் மற்றும் குடியிருப்பு உரிமை தொடர்பான வணிகங்கள் போன்ற துறைகளைச் சேர்ப்பதன் மூலம் இந்தக் குறியீட்டின் வரம்பு விரிவுபடுத்தப்படும்.
இது பொருளாதாரத்தில் முறையான சேவைத் துறையின் பங்களிப்பில் சுமார் 85 முதல் 90 சதவீதம் வரையிலான வரம்பை எட்டச் செய்யும்.
கடந்த ஆண்டின் இதே மாதத்துடன் ஒப்பிடுகையில், இந்த ஆண்டு ஏப்ரல் மாதத்தில் 19 துணைத் துறைகளில் 14 துறைகள் இரட்டை இலக்க வளர்ச்சியைப் பதிவு செய்துள்ளன; அதேவேளையில், மீதமுள்ள கிட்டத்தட்ட அனைத்துத் துறைகளும் நேர்மறையான வளர்ச்சியையே பதிவு செய்துள்ளன.
மிக வேகமாக வளர்ந்து வரும் துறைகளாக தங்குமிடம் மற்றும் உணவுச் சேவைகள் (37.2 சதவீதம்) மற்றும் சில்லறை வர்த்தகம் (30.8 சதவீதம்) ஆகியவை உள்ளன.
தொழில்கள் அல்லது வணிகங்கள் மீது கூடுதல் இணக்கச் சுமையைச் சுமத்தாமல், அரசு அமைச்சகங்கள் மற்றும் ஜிஎஸ்டி (GST) பதிவுகள் உள்ளிட்ட நிர்வாகத் தரவுகளை மட்டுமே பயன்படுத்தி இந்தக் குறியீடு உருவாக்கப்பட்டுள்ளது.
ஜிஎஸ்டி தரவு கிடைக்காத பட்சத்தில், நிர்வாகத் தரவு மற்றும் 'சேவைத்துறை நிறுவனங்களுக்கான வருடாந்திர கணக்கெடுப்பு' (ASISSE) ஆகியவற்றின் கலவை பயன்படுத்தப்படுகிறது.
ISP என்பது ஒரு உற்பத்தி அளவீடு ஆகும்; எனவே, இதை மொத்த உள்நாட்டு உற்பத்தி (GDP) கணக்கீட்டில் பயன்படுத்தப்படும் 'மொத்த மதிப்பு கூட்டல்' (GVA) உடன் ஒப்பிடக் கூடாது.
ஜிஎஸ்டி மற்றும் நிர்வாகத் தரவுகளை அடிப்படையாகக் கொண்டிருப்பதால், ISP தற்போது முறையான துறை சார்ந்த நிறுவனங்களை மட்டுமே உள்ளடக்கியுள்ளது.
அதன்படி, ISP-ல் சேர்க்கப்படாத சேவைகள் என்பவை, அரசின் முக்கியச் செயல்பாடுகள் தொடர்பானவை அல்லது சந்தை சாராத செயல்பாடுகள் மற்றும் முறைசாராத் துறையின் ஆதிக்கம் கொண்டவையாகும். எனவே, இது சந்தை சாராத அரசு நடவடிக்கைகள், தனிப்பட்ட சேவைகள் மற்றும் முறைசாராத் துறை ஆகியவற்றை விலக்கி வைக்கிறது.
நாட்டின் மொத்த மதிப்பு கூட்டலில் (GVA) பாதிக்கும் மேற்பட்ட பங்களிப்பைச் சேவைத் துறை வழங்குகிறது.
ISP அறிமுகப்படுத்தப்பட்டதன் மூலம், பொருளாதாரம் சார்ந்த சேவை, தொழில் மற்றும் விவசாயம் ஆகிய மூன்று முக்கியத் துறைகளுக்கும் இனி வழக்கமான மாதாந்திர அல்லது காலாண்டு உற்பத்திக் குறியீடுகள் கிடைக்கும்.