தேசியச் செய்திகள்

தேசிய உத்திசார் வர்த்தகக் கட்டுப்பாட்டு மையம்

October 20 , 2026 4 days 86 0

மத்திய வர்த்தகம் மற்றும் தொழில்துறை அமைச்சரால் புது தில்லியில் உள்ள வாணிஜ்ய பவனில் தேசிய உத்திசார் வர்த்தகக் கட்டுப்பாட்டு மையம் (NSTCC) தொடங்கப் பட்டது.
இந்த மையமானது வெளிநாட்டு வர்த்தக தலைமை இயக்குநரகத்தின் (DGFT) ஒருங்கிணைப்புடன், வர்த்தகம் மற்றும் தொழில்துறை அமைச்சகத்தின் கீழ் உள்ள வர்த்தகத் துறையால் உருவாக்கப்பட்ட மையப்படுத்தப்பட்ட வர்த்தக நுண்ணறிவு மற்றும் தரவுப் பகுப்பாய்வு மையமாகும்.
நிகழ்நேர வர்த்தக கண்காணிப்பு, சான்று அடிப்படையிலான கொள்கை உருவாக்கம், அதிக வெளிப்படைத்தன்மை மற்றும் விரைவான வர்த்தக அனுமதிகளை செயல் படுத்துவது இதன் நோக்கமாகும்.
இது இறக்குமதியாளர் ஏற்றுமதியாளர் குறியீடு (IEC), முன்கூட்டிய அங்கீகாரம், ஏற்றுமதி மேம்பாட்டு மூலதனப் பொருட்கள் (EPCG) திட்டம் மற்றும் தோற்றச் சான்றிதழ்கள் (CoO) ஆகியவற்றைக் கண்காணிக்கிறது.
சிறப்பு இரசாயனங்கள், உயிரினங்கள், பொருட்கள், உபகரணங்கள் மற்றும் தொழில் நுட்பங்களுக்கான (SCOMET) உரிமங்கள், ஏற்றுமதிக் கடமைகள், ஒழுங்குமுறை இணக்கம் மற்றும் தயாரிப்புகள் மற்றும் சந்தைகள் முழுவதும் வர்த்தக செயல்திறன் ஆகியவற்றை இது கண்காணிக்கிறது.
இது வெளிநாட்டு வர்த்தக தலைமை இயக்குநரக (DGFT) இணையதளம் மற்றும் வர்த்தக இணைப்பு மின்-தளம் (Trade Connect ePlatform) ஆகியவற்றிலிருந்து தரவை ஒருங்கிணைத்து, வர்த்தகத் தடைகள், வளர்ந்து வரும் ஏற்றுமதி சந்தைகள் மற்றும் பயன்படுத்தப்படாத தடையற்ற வர்த்தக ஒப்பந்தங்களை (FTAs) அடையாளம் காண உதவுகிறது.